Na Fundación Celta queremos destacar e aplaudir o compromiso solidario da peña celtista “Cuadrilla de Pepa a Loba”, de Muros (A Coruña), que dende hai máis de vinte anos mantén un firme vínculo coa comunidade indíxena de Totora-K, na rexión de Potosí, Bolivia. Esta peña, presidida por Santiago Vázquez Maceiras e formada por aproximadamente 240 membros, demostrou como o fútbol pode ser unha ferramenta de transformación social.
A orixe deste proxecto solidario remóntase a finais dos anos noventa. Tras un episodio de violencia fóra do estadio, algúns membros da peña decidiron que era necesario “humanizar o fútbol”. Foi entón cando, grazas ao testemuño do misioneiro muradán Francisco Duber Novo, que dende 1962 evanxeliza e acompaña á comunidade de Totora-K, a peña atopou unha causa á que comprometerse.
Dende entón, a “Cuadrilla de Pepa a Loba” enviou unha media de 6.000 euros cada dous anos (3.000 ao ano, chegando incluso aos 5.000 en 2019), cos que se lograron avances cruciais para o desenvolvemento educativo e social na zona. Entre os seus principais logros destacan:
– A construción dun internado con dous pavillóns que acollen a medio cento de mozos e mozas indíxenas. Antes da súa existencia, moitos nenos debían percorrer máis de 8 quilómetros a pé para asistir á escola.
– A mellora do subministro enerxético, pasando de xeradores convencionais a un sistema baseado en placas solares, o que reduciu custos e mellorou a sustentabilidade da instalación.
– A creación dunha biblioteca escolar, que facilitou o acceso aos estudos e materiais educativos.
– O mantemento integral do internado, sufragado integramente pola peña.
– O acompañamento da peña foi clave para reverter o alto absentismo escolar e conseguir que a mocidade da comunidade progrese cara estudos de Bacharelato e mesmo acceda á universidade, algo impensable hai tan só dúas décadas.
Dende a Fundación Celta expresamos o noso profundo recoñecemento á peña “Cuadrilla de Pepa a Loba” por converter o sentimento celeste nunha forza de solidariedade internacional. Este tipo de iniciativas reafirma os valores de cooperación e respecto que se fomentan dende a Fundación Celta.
