Balaídos e a cidade de Vigo volcáronse coa Fundación Celta nunha homenaxe ao impacto social do deporte
A iniciativa“Un partido con corazón” converteu o encontro entre Celta e o Deportivo Alavés nunha gran celebración da Fundación Celta, das persoas que forman parte dos seus programas e do poder transformador do fútbol dentro e fóra do terreo de xogo.
Ao longo da semana previa ao partido, diferentes accións permitiron achegar á cidadanía o labor que desenvolve a Fundación Celta nos ámbitos da inclusión, a educación, a sensibilización e o impacto social. Entre elas destacou a exposición fotográfica instalada na Rúa do Príncipe, un percorrido visual polos proxectos, experiencias e historias que forman parte do día a día da entidade.
Outra das iniciativas destacadas foi o desenvolvemento dunha experiencia piloto de palco sensorial en Balaídos, unha acción impulsada para seguir explorando fórmulas que permitan avanzar cara a un estadio máis accesible e inclusivo para as persoas con autismo. A iniciativa foi levada a cabo en colaboración con Autismo Galicia, a Real Federación Galega de Fútbol e a Real Federación Española de Fútbol.
O punto culminante chegou o día do encontro, cando Balaídos rendeu homenaxe ás persoas, asociacións e entidades que colaboran coa Fundación Celta ao longo do ano. Os abandeirados e escort kids estiveron formados por nenos e nenas de diferentes entidades colaboradoras e do proxecto Celta Integra Zelnova, mentres que numerosos representantes do tecido asociativo galego acompañaron a celebración desde as bancadas.
Un dos momentos máis especiais da xornada foi o recoñecemento a Celta Integra Zelnova, recente campión da LaLiga Genuine 2025/26. Os xogadores e xogadoras saltaron ao terreo de xogo acompañados do trofeo conquistado a pasada tempada para compartilo coa afección celeste, recibindo unha calorosa ovación por parte de Balaídos. O recoñecemento culminou co saque de honra realizado por Fran Díaz, delegado do equipo e unha das figuras máis representativas do proxecto.
A xornada completouse cunha camiseta conmemorativa empregada polos xogadores do primeiro equipo durante o quecemento e posteriormente destinada a unha poxa solidaria, ademais da habilitación dunha Fila 0 para apoiar os proxectos sociais impulsados pola Fundación Celta.
“Un partido con corazón” foi moito máis que un encontro de fútbol. Foi unha celebración da inclusión, da solidariedade e do compromiso colectivo, un reflexo do propósito da Fundación Celta de seguir demostrando que o fútbol transforma vidas.
Revive todos os momentos desta xornada tan especial para a Fundación Celta no INSIDE exclusivo publicado na nosa canle de YouTube e descubre, desde dentro, como se viviu “Un partido con corazón”, unha celebración do fútbol que transforma vidas.
