O RC Celta e a Fundación Celta súmanse á duodécima edición da “Semana de Acción” anual da asociación Football CAFE, que este ano ten lugar entre o 8 ao 24 de marzo, nun firme compromiso por promover o acceso, a inclusión e a participación de persoas con discapacidade no ámbito do fútbol. Esta iniciativa, baixo o lema #TotalAccess, representa unha valiosa oportunidade para resaltar historias positivas de inclusión e acceso no ámbito deportivo.

Co obxectivo de unirse a un dos principais socios da RSC da UEFA, o RC Celta xunto á Fundación Celta organizaron unha reunión, no Salón Rexio da Sede, con algúns dos seus abonados pertencentes ao colectivo de persoas con discapacidade. O propósito deste encontro é escoitar de primeira man as inquietudes deste colectivo e explorar vías para mellorar a súa integración e adaptación dos espazos dentro do club. Unha iniciativa que demostra o compromiso do RC Celta por fomentar unha contorna inclusiva e accesible para todos os seus afeccionados.

Desde 2013, a Semana de Acción da asociación Football CAFE brindou a persoas e organizacións afíns a oportunidade ideal para centrar a atención na discapacidade, reafirmar os seus compromisos cun xogo inclusivo e demostrar o valoradas que están nel as persoas con discapacidade.