O conxunto celeste estreará o curso no mes de novembro na cidade deportiva Mediterranean Sports Club, en Tarragona, onde disputará os seus primeiros encontros da temporada fronte ao Cádiz CF, Real Betis e Real Madrid.

Ao longo do curso, o equipo continuará percorrendo diferentes puntos da xeografía española para compartir experiencias, convivencia e os valores que fan única a LALIGA Genuine Moeve. O calendario levará ao Celta Integra Zelnova ata Pamplona, Xixón e Madrid, escenarios das seguintes fases da competición.

As xornadas disputaranse nas cidades deportivas do CA Osasuna, Real Sporting e Atlético de Madrid, converténdose de novo en puntos de encontro para centos de xogadores e xogadoras que atopan no fútbol unha ferramenta de inclusión, aprendizaxe e crecemento persoal.

Tras unha temporada histórica na que o Celta Integra Zelnova se proclamou campión de LALIGA Genuine Moeve, o equipo afronta este novo reto coa mesma ilusión, compromiso e espírito de superación que o converteron nun referente dentro e fóra do terreo de xogo.

Un curso máis, a Fundación Celta seguirá acompañando ao equipo nunha competición que vai moito máis alá dos resultados e que representa á perfección o seu propósito: utilizar o fútbol como unha ferramenta para crear oportunidades, fomentar a inclusión e seguir transformando vidas.

Porque na Fundación Celta cremos que o fútbol transforma vidas.